هذا رأيي في جوائز المهرجان الوطني للفيلم
الأحد 18 مارس, 2018 15:13 المحجوب فرياتشي حد قال ان لكل لجنة تحكيم جوائزها الخاصة يعني الا بدلتي لجنة التحكيم غادي تتبدل بالضرورة الجوائز.
كلام صحيح، فالمهرجان الوطني للفيلم بطنجة اللجنة عطات جوائز ، وتشكر بزاف انها جنباتنا ازمة بمنحها جايزة مستحقة لفيلم وليلي ديال فوزي بنسعيدي او حتى جائزة لجنة التحكيم كانت فمحلها لان تالا حديد قدمات فيلم وثائقي قوي ” منزل الحقول”.
فيلم بنسعيدي ربح جوج جوائز ما فيهم نقاش هي جائزة السيناريو و جائزة احسن دور نسائي لي ربحاتها نادية كوندا باستحقاق كبير.
ندوزو دبا لباقي الجوائز: جائزة الاخراج خذاها هشام العسري حول فيلم ما نقدر نقول عليه والو لانني ما فهمتوش. صراحة هو فيلم تجريبي عكس عوالم هستيرية ديال العسري يمكن اللجنة شافت شي حاجة انا ما فهمتهاش او اعتقد صعيب تلقاو لي اعاود ليكم قصة الفيلم.
انا شخصيا ما استوعبتهاش.. هاذ الجائزة شخصيا تنعطيها لبورن اوت ديال لخماري.
حاجة اخرى ما مفهوماش هي فوز حسن بديدا بجائزة ثاتي دور رجالي على فيلم الجاهلية، وهنا كاين مشكل كبير ما كرهتش لجنة التحكيم تشرحو كفاش واحد هو بطل الفيلم او تيربح جائزة ثاني دور رجالي. الأمر غريب وعجيب، هاذ الجائزة كان تيستحقها محمد الرزين على فيلم دووار البوم ولا احمد الناجي على نفس الفيلم.
بخصوص اول دور رجالي ربحها حسن مالزي على فيلم وليلي، والصراحة محسن استفاد من الدور الجيد ديال نادية كوندا ، التشخيص ديالو كان متواضع.
فيلم غزية ديال عيوش ربح جائزة غريبة هي جائزة ثاني دور نسائي لدنيا بينبين او هي اغرب جائزة تمنحات او حتى واحد مكان منتظرها او باقي ما قدرتش نهضمها.. الممثلة الشابة قدمات دور “غامض” او عادي الى ضعيف ، او تم تجاهل ممثلة جيدة فدوار البوم او السعدية لديب فبورن اوت او باعدي في فيم ولولة الروح.
بخصوص حازة التصوير ربحها فيلم بلا موطن ديال نرجس النجار وهي جازة يمنكن هضمها.
بخصوص جوائز الفيلم القصير كانت موضوعية وفيلم غربان ديال معدان الغزواني فيلم ممتاز.
