شذرات قمرية: عندما حدثني بصطاوي ف التلفون..
الأربعاء 24 يونيو, 2015 16:05 محمد الشوبيكنت جالس كنقرا البيان والتبيين لأبو عمر الجاحظ ، وداخل كنتقاتل مع ديك اللغة الصعبة ديال القدام ” اللهم إنا نعود بك من فتنة القول ،كما نعوذ بك من فتنة العمل ،ونعوذ بك من التكلف لما لانحسن ، كما نعوذ بك من العجب بما نحسن ،ونعوذ بك من السلاطة والهذر ، كما نعوذ بك من العي والحصر. وقديما ما تعوذوا بالله من شرهما ، وتضرعوا إلى الله في السلامة منهما”. وإذا بالتيليفون كيصوني ، جاوبت بلا مانشوف الرقم، وإذا بصوت البصطاوي يطالعني من الهاتف قائلا ” أكداير ادعاوي البلا “..
أجبته الحمد لله السي محمد
فقال ” را مجد وبنبراهيم وأنا غنجيو نفطروا معاك ليلة الفضيلة “..
مرحبا السي محمد تشرفوني
فقال ” كيف داير التلفزيون هاد العام ؟”
علاه ما كتشوفوهش من عندكم ؟
قال ” لا حنا كنشوفوا غير داك الشي لي حقيقي وكيمشي فوق الأرض ، أما التلفزة والأنترنيت والسينما وكل حاجة مسجلة ماكتبانش لينا وماكنسمعوهاش “..
التلفزة مشات السي محمد..
قال ” التلفزة راه مشات من شحال هادي ، واش زعما مللي مشينا زعما حيدو ديك البسالة ولا مازال ؟”
زادو فيها السي محمد زادو فيها..
قال ” وكيف زعمة ؟”
حكرة
قال ” غيقلبوا من دبا 5 سنين على شي بنادم مغربي ، ماغاديينش يلقاوه ، غيلقاو غا صحاب الخشيبات بالسميطات ، وفكارن الغيس باللحية ”
الله يدير تاويل …. وإنقطعت المكالمة .
رجعت للبيان والتبيين ، وبقيت مسمر مع اللغة اللي كون قراها نور الدين عيوش ، كون قال ليك العربية اليوم هي الدارجة الحقيقية ، وكون سد فمو على الملأ ، وخلا للي عندو شي تخصص يقوم به ، راه أخويا البصطاوي ، هاد الناس مابقاوش بغاو يهضروا عموما ، ويخليو مالين التخصصات يشرحوا ليهم ، راه ولاو هما للي كيفصلوا فالتخصصات من علم النفس حتى للدارجة للي ماعارفينها كاع كيف تكونات عبر السنين ، واش كتسمعني يا البصطاوي..
